As pedras son vellas si, como vella é a teima do adanismo, esa arte de non recoñecer que antes de nós tamén houbo vida . Celebramos que o goberno de Cedeira queira documentar agora o patrimonio xeolóxico local-comarcal cunha rota de interpretación cos 25.000 euros que lle pensa achegar a Deputación de A Coruña. O executivo local vai tirar información dun tríptico realizado polo Club Montaña Ferrol cos principais puntos de interés. Non hai moito fixéronse unhas xornadas pola USC coa participación dos alcaldes Vergara e Armada. A revista Olláparo deu conta dese patrimonio a comezos dos 90 e o Concello de Cedeira xa contou cun tríptico informativo editado polo goberno de Xoán Xosé Rodríguez, cecais conserven algunhas copias na Oficina de Turismo ou na Biblioteca.
Os holandeses, ingleses e alemáns que viñan documentar as súas teses foron os primeiros en dicírnolo hai moitos anos: o Ortegal é unha das zonas máis antigas da codia terrestre, rica en “graiños negros” ou ecloxitas, dunitas, rochas básicas, ultrabásicas, anfiboles, serpentinas e gneis. No ano 2006 un artigo en ‘Journal of the Geological Society’ púxolle data: 1.160 millóns de anos.
A dereita petrificada de aquí non está afeita a explicarse, mais o interese do proxecto ben merece unha parrafada, non si?
Quen está a participar na redacción da proposta?
Se o obxectivo é pór en valor ese patrimonio documentando a paisaxe xeolóxica por qué non utilizar a “aula xeolóxica” ou o “centro de documentación e interpetación” como base científica do proxecto coa fin de incorporar expertos das universidades?
Non sería bo contar con proxectos do valor científico e didáctico de Ao noroeste do Noroeste ?
Non sería interesante reeditar periodicamente as Xornadas que se fixeron e que permitirían a sistematización do proxecto en base a unha revisión bibliogràfica que mostrara a producción científica que hai e que reflexionara sobre a xestión e planificación de espazos de interese natural?
Se o proxecto o está a financiar a Deputación, non sería bo facelo da forma máis abranxente e incluir toda a comarca de Ortegal nun proxecto común?
E así, postos a abrazar as pedras, sería engaiolante que o proxecto de documentación do patrimonio xeolóxico (mapas, vídeos, artigos científicos) non obviara nen esquecera o patrimonio lingüístico ( o que deu nome á paisaxe, a cada pedra, outeiro e regato) nen o patrimonio material de pedra que permanece oculto ou padecendo desleixo ( casas de San Andrés, mámoas, cruceiros, castros, mamposterías, muiños, construccións adxectivas, milladoiros,etc).
Que non quede en simple reclamo turístico sen fundamentación e continuidade. As pedras hanse de inserir na paisaxe toda, na cultura do país. Parabéns pola iniciativa.
Grazas polo artigo. E moi interesante. Gostaria que tratasedes mais deste tema. Podense aprender moitas cousas. E algo esquecido que hai que espertar.