O Concello de Cedeira promove a participación da veciñanza aderíndose ao certame “Youtubeir@s”, unha iniciativa impulsada polos Servizos de Normalización Lingüística de trece concellos galegos, incluído o local, a Deputación da Coruña e as universidades da Coruña, Santiago de Compostela e Vigo.
[Pingota] O obxectivo da convocatoria é fomentar e visibilizar o uso do galego en You Tube, procurando principalmente a complicidade a xente moza con premios en metálico que van desde os 500 aos 1.000 euros dependendo da categoría.
Vídeo-facermos, vídeo-opinarmos, canle e vídeo-cantarmos son as catro modalidades abertas á participación de todas as persoas maiores de 14 anos que desexen tomar parte nun certame que premia os vídeos en galego autoproducidos e subidos a You Tube de xeito independiente con data posterior ao 15 de marzo do 2018.
No caso de tratarse de persoas menores de idade, a petición deberá ir acompañada da autorización do pai/nai ou titor/a legal mediante o documento que se fornece na web do proxecto (http://youtubeiras.gal/). O prazo de inscrición finaliza o día 27 do presente mes de setembro.
O goberno municipal anima aos veciños e veciñas a implicarse nun proxecto innovador, polo asunto do uso das tecnoloxías, e mesmo motivador, por cando favorece a creatividade, alén de contribuír á difusión da cultura galega.
Mil Primaveras
Precisamente, o vindeiro sábado 21 de setembro, terá lugar o acto de entrega do premio Mil Primaveras que vén de recibir o proxecto Youtubeir@s polo seu carácter innovador. O acto terá lugar no Pazo de Cultura de Pontevedra. Os premios Mil Primaveras son unha iniciativa da coordinadora de traballadores/as de Normalización da Lingua para recompensar e proxectar o traballo ben feito no ámbito da normalización lingüística, darlle visibilidade a proxectos positivos e seleccionar boas prácticas que
poden servir como modelos.
No caso de Youtubeir@s, o galardón foille concedido “por abordar un medio prioritario para o futuro do idioma”, xa que ten unha grande capacidade de atracción na xente nova. Igualmente, o xurado valorou o uso que se fai de linguaxes e estratexias comunicativas atractivas para a mocidade e que favorece que “as persoas que transmiten a través de You Tube o fagan en galego e que as que comunican en galego o fagan en You Tube”.
Celga
O Concello de Cedeira informa dunha nova convocatoria, por parte da Secretaría Xeral de Política Lingüística, para a obtención dos certificados acreditativos dos niveis de lingua galega Celga 2 e 4. As probas terán lugar na segunda quincena do próximo mes de novembro de 2019.
O prazo de matrícula finaliza o día 1 de outubro e o importe da taxa ascende a 16,19 euros. As probas, dirixidas a persoas maiores de 16 anos e distintas nacionalidades, serán en Santiago de Compostela e na localidade de Ponferrada.
O goberno municipal recorda que para máis información e axuda os interesados teñen a posibilidade de recorrer ao Servizo de Normalización Lingüística do Concello, cuxo enderezo electrónico é normalización@cedeira.gal e o seu número de teléfono o 607323833. O texto da
convocatoria tamén pode ser consultado en: https://www.xunta.gal/dog/Publicados/2019/20190910/AnuncioG0535-020919-0001_gl.html
