En rolda de prensa en Compostela ADEGA, Asociación Frouma , Asociación Galega de Apicultura (AGA), Asociación Pola Defensa da Ría (APDR), Amigos da Terra, Colectivo Agrocuir da Ulloa, Confederación Intersindical Galega (CIG), Comando Ghichas do Valmiñor, Federación Rural Galega (Fruga), Montegal, Organización Galega presentan un relatorio que cuestiona a actual proposta de revisión do Plan Forestal, da que piden a súa anulación, e as medidas contempladas na Estratexia galega contra o cambio climático, das que consideran que acabará potenciando o cultivo do eucalipto. Piden afrontar “a perda acelerada de biodiversidade” en Galiza, e avogan por unha redución progresiva da superficie ocupada por eucaliptos, así como pola eliminación de plantacións ilegais en terras agrarias e bosques autóctonas e a necesária e sen demora creación dun inventario de masas frondosas autóctonas, ademais de pór en marcha axudas directas e exencións fiscais para o mantemento de bosques autóctonos. Entre o pacote de propostas, destaca a moratoria indefinida da plantación de eucaliptos, así como o impulso dunha lei que favoreza a multifuncionalidade do monte e a obrigación de reservar un 30% para bosque autóctono en plantacións forestais.
A máis, piden que se elabore unha nova proposta para o Plan Forestal que pivote sobre tres eixos: que parta dunha información actualizada” sobre a situación do monte galego, que esta aberto a unha participación “equilibrada” de todos os axentes sociais; e que teña como “principios reitores” a “diversidade de hábitats e especies, a mencionada multifuncionalidade de usos, o fomento do arborado autóctono, o mantemento dos servizos ecosistémicos, a non privatización dos montes veciñais, a creación de emprego e a sustentabilidade económica e social”.
