Nun post anterior alertabamos dos estragos producidos por esa conciencia naif instalada na sociedade , o que é pior, nas políticas aplicadas nos últimos anos, e que nos levan ao simulacro permanente, ao como si .
Esa teima da Demarcación de Costas en convertir todo o litoral nunha enxurrada de estradas, aparcadoiros, farolas e pasarelas está a consolidar a destrucción da costa. No canto de revertir e corrixir a presión exercida cando non había nengún tipo de protección (marbellización) , estase a proxectar máis unha agresión sob a capa de protección. O Plan de Ordenación do Litoral de Feijoo é unha pura ambigüedade destinada a desprotexer 20.000 h. menos que as proxectadas na lei dos 500 metros do bipartito. Hai exemplos a eito por todo o litoral galego (Cedeira, Viveiro, Barreiros, Foz, Orzán, Perbes,… ). Todos eles escenifican o simulacro de caracterizar como protexido, mesmo como desenvolvimento sustentabel, o que non é mais que unha concepción do territorio como investimento financieiro que esquece as coordenadas sociais, culturais, xeográficas, ecolóxicas e identitarias de cada lugar. Actuacións que seican están dirixidas a protexer (asín son presentadas) deturpan o significado de “espazo protexido” (Rede Natura) e móvense no curtopracismo especulativo cando estas actuacións son asuntos a longo prazo xa que, afectándonos a nós, determinan a sociedade futura. Confundese premetidamente co obxectivo de colonizar espazos que deberían ser intocábeis – se é que ainda nos queda un bocadiño de autoestima- xa que a súa supervivencia depende de fios moi febles que calquera desequilibrio pode tornar irreversibel. Sobre o xestión do territorio non pode haber potestades exclusivistas . Os regatos e a zona perimetral das dunas son tan importantes como a própia lagoa e as dunas. Que futuro se está a proxectar con esta desfeita? Qué turismo se está a fomentar? Isto é o que está a punto de acontecer na Frouxeira se o proxecto supera a fase de información pública.
Velaquí o Anuncio da Demarcación de Costas en Galicia referente á Información pública do estudo de impacto ambiental e do proxecto “Actuacións no entorno de A Frouxeira T.M. de Valdoviño (A Coruña) ref.: 15-0659”.Ministerio de Medio Ambiente, y Medio Rural y Marino
Vede o anuncio aquí: BOE número 202 de 23/8/2011, páxinas 84554 a 84554 (1 páx.) Referencia: BOE-B-2011-27972
