A atuaçom, adjudicada por 586.850 euros, ampliará o vaso até os 25 metros e renovará a envolvente e os sistemas da instalaçom para reduzir o consumo energético. A reforma permitirá assim que Cedeira disponha, depois de décadas com um vaso de dimensons reduzidas, duma piscina de 25 metros e duma instalaçom adaptada a critérios atuais de funcionamento, conforto e eficiência energética.
O Concello de Cedeira iniciou as obras de ampliaçom e reforma da piscina municipal, uma atuaçom longamente demandada que permitirá adaptar uma instalaçom com quase 35 anos de antiguidade às necessidades atuais. Os trabalhos foram adjudicados por 586.850 euros, IVA incluído, e contam com um prazo de execuçom de sete meses.
A obra desenvolve-se ao abeiro do convénio assinado entre o Concello e a Deputaçom da Corunha. A instituiçom provincial achega 300.000 euros ao projeto, enquanto a administraçom municipal assume o financiamento restante.A transformaçom mais visível será a ampliaçom do vaso. A piscina atual, de pouco mais de 16 metros de comprimento e oito de largura, passará a medir 25 × 11,6 metros, umas dimensons equiparáveis às habituais nas piscinas semiolímpicas. A intervençom aumentará também a superfície da zona de praia e obrigará a adaptar o conjunto do edifício à nova configuraçom.

A reforma nom se limita, porém, ao aumento do espaço destinado à nataçom. Uma parte importante do projeto procura corrigir as deficiências de isolamento e melhorar o comportamento energético dum edifício inaugurado há quase 35 anos. Para isso será renovada a cobertura, construídos novos muros laterais e reformadas as fachadas.
Uma parte importante do projeto procura corrigir as deficiências de isolamento e melhorar
o comportamento energético dum edifício inaugurado há quase 35 anos.
Na fachada leste instalará-se vidro isolante, que facilitará a entrada de luz natural e contribuirá para reduzir a necessidade de iluminaçom artificial. O projeto contempla também a melhora da envolvente térmica do edifício, um dos pontos mais deficientes da instalaçom atual e determinante num equipamento que requer manter de forma constante condiçons específicas de temperatura e humidade.
A atuaçom inclui igualmente a substituiçom dos equipamentos de depuraçom da água, renovaçom de ar e iluminaçom por sistemas mais modernos e eficientes. A combinaçom destas medidas deverá permitir reduzir o consumo energético e melhorar o conforto interior da piscina.
A ampliaçom responde também ao elevado uso desportivo e social da instalaçom. Segundo dados municipais, durante 2024 participaram nas diferentes atividades da piscina mais de mil pessoas, entre banho livre, nataçom infantil e de adultos, ginástica aquática, programas de saúde e os treinos do Club Natación Cedeira.

















