A Plataforma Galega Vivenda Xa! convoca este sábado, 3 de outubro, às 11.30 horas, uma nova mobilizaçom em Ferrol para reclamar políticas públicas que garantam o acesso a uma vivenda digna e ponham freio à especulaçom imobiliária. A concentraçom terá lugar na Praça Amada García, diante do edifício da Xunta da Galiza, sob o lema «Galiza toma a rua!» e com três reivindicaçons centrais: «A vivenda é um direito», «Stop especulaçom» e «Vivenda pública e acessível».
A convocatória dá continuidade às mobilizaçons que durante os últimos dias se estenderam por várias cidades galegas perante o encarecimento dos alugueres, os despejos e as crescentes dificuldades de acesso à habitaçom. Em Ferrol, a concentraçom celebrada esta segunda-feira na Praça de Armas reuniu várias centenas de pessoas e voltou pôr no centro do debate a existência de habitaçons públicas sem uso, nomeadamente no bairro de Recimil, e o aumento dos preços do aluguer.As mobilizaçons pola vivenda vêm intensificando-se na Galiza ao longo de 2026. As plataformas convocantes reclamam, entre outras medidas, mais parque público de vivenda, alugueres acessíveis, limitaçons à especulaçom e aos despejos e maior controlo sobre os usos turísticos da habitaçom.
A cita de sábado em Ferrol insere-se, portanto, numa mobilizaçom mais ampla que reivindica a vivenda como direito social e nom como ativo destinado prioritariamente ao investimento e à obtençom de rendas.
