A Associaçom Galega da Língua (AGAL) continua com os preparativos da leitura continuada do romance Scórpio de Carvalho Calero na tarde do dia 30 de outubro, 110 aniversário do seu nascimento.
A leitura do primeiro trecho vai corresponder à neta de Carvalho Calero, Margarida Cela, em que delegou a sua mãe devido a que as circuntâncias sanitárias nom lhe permitirám viajar a Santiago. A seguir lerá o presidente do Parlamento de Galicia Miguel Anxo Santalices, o presidente da AGAL Eduardo Maragoto, o alcalde de Compostela Xosé Sánchez Bugallo, o reitor da USC Antonio López, o secretário geral da Política Linguística Valentín Garcia, o deputado provincial Xurxo Couto e mais representantes da vida política e associativa. Na tarde do dia 30 de outubro, 110 aniversário do seu nascimento as pessoas irám passando polo atril para lerem o seu trecho depois de terem passado por umha mesa em que o poderám treinar brevemente. Ao acabarem, fora do Salom Nobre, no Cláustro de Fonseca, receberám um prémio bem bonito (obséquio do Concello de Santiago de Compostela e da AGAL e editado pola Através). 
Segundo foi explicado por carta a cada um e umha das leitoras, “a organizaçom da Leitura é consciente do dececionante que será para as pessoas participantes ter que homenagear Carvalho com tantas restrições, mas nom queremos que o grande pensador do galego fique sem a sua homenagem, que sem dúvida havemos de repetir assim que esta crise de saúde pública passar.”, disse no web de AGAL. Ao mesmo tempo, outros escritores e escritoras que nom poderám estar fisicamente na leitura estám a divulgar vídeos de apoio ao evento com a declamaçom de excertos da obra em vídeo, como Fina Casalderrey ou Iacyr Anderson Freitas.
O tempo de leitura será, afinal, de aproximadamente quatro horas e de só 100 trechos. Começará às 17:00 do dia 30 de outubro e finalizará às 21:00 dessa mesma sexta-feira. Realizará-se em Compostela, no Salom Nobre de Fonseca, da USC, seguindo estritamente as normas de segurança estabelecidas pola Universidade.
Como participar? Podes preencher o seguinte formulário online: https://carvalho2020.gal/leitura-continuada/ .
