Unha recuperación que comezou hai 27 anos acabou por ser unha das citas senlleiras das que teñen como referencia a vila de Cedeira. A última edición da Festa do Samain celebrouse esta fin de semana baixo un outonizo sol de excepción, como colofón aos obradoiros e intervencións artísticas que promoveron con grande éxito de participación a Asociación Amigos do Samaín e o Concello de Cedeira coa colaboración da Anpa Picapeixe, a asociación Buxaina e o IES Punta Candieira.
Espazos de sentido.A celebración de obradoiros de pintura, zonchos, adornos e disfraces foron o adianto dunha cita que viviu o día grande co certame de tallado de cabazas, o obradoiro de maquillaxe a merendola de outono e o pasarrúas polo casco histórico da vila. O desfile inzou de pantasmas ás rúas e ruelas, xente vária coas facianas emborranchadas de cisco e brincando para riso-pavor dos asistentes.
