Unha femia de máis de 4 metros de caldeirón. Malia estar xa moi descomposta, os especialistas e voluntarios do CEMMA (Coordinadora para o Estudo dos Mamíferos Mariños) apañaron mostras de pel, músculo e graxa. Xunto coas biometrías servirán para facer seguimento das posibles causas destes varamentos. Moitos destes cetáceos que sempre entraran na rías galegas ( candorcas, espolartes, delfíns, golfiños, boto, bufa, etc) co cebo da sardiña, son víctimas da interacción coas redes e tramallos, ainda que non foi este o caso. O que xa non temos tan presente é a contaminación acústica do medio mariño.
O ateigado tránsito marítimo de transporte de mercadorias, barcos pesqueiros e portos intensificou nas derradeiras décadas o son que producen os radares nas costas que, xunto á interacción coas redes, está ter consecuencias mesmo irreversibles para o ecosistema marítimo no mundo enteiro. Nomeadamente para aquelas especies coma as baleas, golfiños e arroaces, quer dicer, os cetáceos. A bioacústica tenta debullar esta interacción continua entre os cetáceos e acción humana na procura de evidencias da continua degración do ecosistema mariño que se está a dar, principalmente, no Atlántico Norte e no mar Mediterráneo. A exposición a barullo excesivo pode provocar a perda de capacidade auditiva destes animais impedindo a comunicación social que lles permita sobrevivir. Esta diminución, amais, pode provocar a incapacidade para captgar os sons de baixa frecuencia que emiten os barcos para evitalos.
Rede de Varamentos de Galicia
Dado o elevado número de varamentos rexistrados durante a década dos noventa e as figuras de protección que teñen os cetáceos, en 1999 estableceuse un Convenio entre a autoridade competente da Xunta de Galicia e o CEMMA para crear a Rede de Varamentos de Galicia, que segue vixente 16 anos despois. Téñense rexistrado 22 especies, o que dá unha idea da importancia das comunidades de cetáceos no litoral galego.Só no referente a mamíferos, nos dez primeiros anos de funcionamento (1999-2008), atendéronse 2.256 cetáceos (de 18 especies) e 58 pinnípedos (de 3 especies). Na actualidade a CEMMA ten dúas Unidades Móbiles de atención permanente aos animais varados, unha con base en Nigrán (Pontevedra) e outra unidade con base en Ferrol (A Coruña).
