Despois de presentar en marzo deste ano 2014, unha pregunta no Congreso dos Deputados relativa ao deterioro da praia da Madalena, da que ainda non se sabe resposta, e ante a actuación que se está a desenvolver na praia da Madalena, a portavoz do BNG de Cedeira vén comunicar que a súa formación presentou o día 23 no Parlamento Galego varias iniciativas parlamentares con respecto ás actuacións previstas na praia da Madalena de Cedeira: unha proposición non de lei para o seu debate en Comisión; unha pregunta para a súa resposta oral en Comisión e outra para a súa resposta escrita.
Mediante a presentación da proposición non de lei, o BNG expresou a súa determinación a que o Parlamento inste á Xunta de Galiza tanto a defender unha solución integral á situación da praia da Madalena, baseada en estudos medioambientais, como a esixir a paralización inmediata das obras e non autorizar achegas de area á praia mentras non se faga unha avaliación do seu impacto ambiental.
Ao mesmo tempo a formación nacionalista formuloulle á Xunta de Galiza unha serie de preguntas nas que incide en si pensa a Xunta de Galiza, en aplicación do Decreto 28/2009, do 29 de xaneiro, polo que se crea a reserva mariña de interese pesqueiro, Ría de Cedeira, condicionar calquera autorización á realización dunha avaliación de impacto ambiental, vai polo tanto emitir a Xunta de Galiza, como é preceptivo, un informe ambiental e vai esixir a paralización inmediata das obras.
