[Pingota Comunicación] O Concello de Cedeira vén de sacar a licitación a renovación da rede de saneamento nas rúas Paz, Silva e Floreal, “a obra que garante especialmente o benestar dos veciños destas rúas, mas iso tamén será sentido tanto na praia como na ría”, afirman desde o goberno municipal (PSOE, BNG e Anova). Trátase dun proxecto financiado na súa totalidade polo Deputación da Coruña que transformará a actual rede unitaria de saneamento, “moi deteriorada”, por unha nova rede separadora ao longo dun trieto de case meio quilómetro no conxunto das tres rúas. O investimento ascende a 146.896 euros
(IVE incluído).
As obras consistirán na substitución dos colectores de augas residuais, por outros de PVC, así como na execución dun novo colector exclusivo para pluviais. O prazo de execución será de tres meses e o día 25 de marzo é a data límite para presentar ofertas.
O proxecto tamén contempla a realización dun total de 65 acometidas domiciliarias, a construción de 21 pozos de rexistro fabricados en formigón e o mesmo número de sumidoiros cuxa capacidade de desaugadoiro será suficiente para absorber alomenos o 70% do caudal de referencia. A obra rematará coa reposición dos asfaltados que poidan verse afectados por unhas
intervencións que, “aínda molestas durante a súa execución, melloran a calidade de vida dos veciños e contribúen á conservación do medio ambiente”, segundo o executivo local. “Esta é a liña de traballo que se está a levar a cabo desde o principio e na que seguiremos insistindo ata o final do mandato”, afirman.
