Comeza a construción das novas estructuras na Biblioteca López-Cortón de Cedeira

[Pingota Comunicación] O goberno de Cedeira mantén o prazo do mes de maio para ver rematadas as obras de accesibilidade que se están a acometer na biblioteca municipal e que motivaron o traslado do servizo de lectura e consulta ao Palacete municipal.
A empresa contratada, Prace, Servicios y Obras SA, xa deu por finalizado o proceso de retirada de entullo, incluído o xerado pola demolición da casa lindeira á biblioteca, e agora está a traballar na construción da estrutura, espezando polo oco do ascensor, que pasará a ocupar o espazo que deixou baleiro a vivenda. A fonte da Pixana tamén foi tapiada que garantir a súa conservación.
O proxecto, adxudicado por 207.696,26 euros, consistirá na instalación e posta en funcionamento dun novo ascensor, na reforma do baixo -antes ocupada polo Xulgado de Paz-, na apertura dun novo acceso peonil desde a rúa Consistorio e na habilitación dunha sala máis de estudo. A actuación tamén inclúe a mellora da iluminación existente coa colocación de lámpadas tipo led, así como na colocación de novos andeis, a reparación dos actuais, a instalación dun sistema de seguranza contra incendios e a construción dun aseo para persoas con discapacidade no primeiro andar.
O goberno municipal recoñece que a realización das obras agora en proceso de execución está entre as prioridades fixadas para o presente mandato por tratarse dun servizo moi demandado e que tamén estaba a necesitar un gran cambio, sobre todo no relativo á accesibilidade.