[Pingota Comunicación] Este sábado comeza na vila de Cedeira unha nova edición do programa “Cantos e Contos ao Solpor”, unha iniciativa do Concello para transitar do verán ao outono da man do teatro, a música e historias populares. A laranxeira do Concello volve ser un ano máis a referencia para as persoas que gusten de asistir a unhas citas culturais que son de balde e que comezan ás oito da tarde. A primeira delas correrá a cargo da compañía Aldaolado, que porá en escena a obra “Cría fama e bótate a correr”, un espectáculo no que compañía foi quen de mesturar os seus mellores números con novos enredos, poemas, cancións e mesmo tamén algúns xogos.
O programa “Cantos e Contos ao Solpor” pechará o día 29 coa participación da veciñanza con relatos populares. Tamén será ás oito da tarde.
Músicas da lusofonía
As músicas galega, portuguesa e brasileira chegarán a Cedeira o día 23 coa actuación ao vivo de Falúa, composto por Sara de Sousa na voz e Gom de Abadim na guitarra acústica, integra no seu repertorio un percorrido polos sons da lusofonia con músicas galegas, portuguesas e mesmo brasileiras. A formación folk do guitarrista mistúrase coa tradición fadista, creando así o estilo que dá unha nova luz a temas que fan parte da historia musical lusófona.
Cinema no Auditorio
O Concello recupera a partires do día 17 de setembro, a programación de cinema no auditorio. Esta primeira proxección arrincará ás 20.00 horas co filme “100 años de perdón”. Un thriller visceral de denuncia e compromiso de Daniel Calparsoro coas boas interpretacións de Luis Tosar e Rodrigo de la Serna. O prezo da entrada é de 3 euros. A sesión está aconsellada para maiores de 12 anos.
