[Pingota comunicación] A promoción turística de Cedeira, e máis concretamente do camiño ao Santo André de Teixido, leva ao alcalde do municipio, Pablo Moreda Gil, a visitar Fitur (Feria Internacional de Turismo) que esta semana se celebra en Madrid. Para o goberno cedeirense son dous os temas que alicerzan esta visita: reivindicar o territorio como destino ou orixe da considerada por algúns investigadores como a primixenia ruta de peregrinación que houbo en Galiza, a de Teixido, e dar a coñecer as posibilidades que ofrece o territorio cedeirense entre os operadores turísticos que acuden á feira. O primeiro obxectivo materializarase mañá mesmo co acto de presentación do Camiño Medieval que, promovido pola área de turismo da Deputación da Coruña, correrá a cargo do presidente da Fundación Santo André de Teixido.
Esta iniciativa institucional está centrada nos tres camiños que percorren o territorio da provincia. Dous deles, o Camiño Inglés e o de Fisterra-Muxía están xa instalados no mapa das peregrinacións, mais será sen dúbida a Ruta do Medievo, o camiño que vai desde Betanzos até Santo André de Teixido, o que máis sorprenderá neste acto de promoción nun dos máis importantes escaparates mundiais do turismo. Trátase dunha senda de comunicación entre os dous centros de peregrinación que son Santo Andrés de Teixido e Santiago de Compostela, contando como eixe de conexión coa capital do antigo Reino de Galiza, Betanzos. O alcalde, Moreda Gil, equipara a relevancia que poida ter Santiago dentro da ruta Xacobea á que por historia e cultura xa ten Cedeira cando se fala de Santo André de Teixido. Desta cuestión o rexedor tamén falará cos operadores na reunión prevista para o xoves. Nela, o alcalde exporá as posibilidades turísticas que oferece un municipio que, como xa ficou claro con motivo do paso da Vuelta Ciclista a España, dispón de moitos e moi destacados recursos naturais, paisaxísticos e culturais para formar parte da oferta turística a todos os niveis.
Camiños de A Coruña
Moreda entende que o acto celebrado en Madrid pode representar un tempo novo de coñecemento e defusión para a máis importante ruta de peregrinos, despois de Santiago, tal vez unha das máis antigas de Galiza.
A presentación, que se insire no programa oficial co título “Camiños de A Coruña”, contou coa intervención do deputado Antonio Leira, que falou do Camiño Inglés, e co reparto de exemplares dunha revista publicada pola Fundación Santo André de Teixido sobre a ruta que ten como destino o territorio cedeirés. Ramón Tudela, en calidade de presidente desta entidade, reivindicou o carácter popular dunha ruta que enlaza a cidade de Betanzos co Ortegal e que recorre espazos tan fermosos como as Fragas do Eume e a Fervenza do Belelle, e monumentos tan emblemá- ticos como os castelos de Naraío e Moeche. Por este motivo, Tudela lanzou unha chamada de atención no sentido de protexer un lugar “máxico e tremendamente espiritual”, ademais de promover actividades e realizar campañas para dalo a coñecer. Durante a celebración de Fitur repartiranse 15.000 exemplares dunha revista da que foron editados un total de 30.000. O pavillón audiovisual de Galiza acolleu un encontro no que se deron cita, ademais dos alcaldes de Cedeira e Valdoviño, Pablo Moreda e Alberto González, respectivamente, representantes da Xunta e da Deputación da Coruña. De feito, a iniciativa partiu da institución coruñesa para destacar a importancia dos tres camiños que teñen unha especial relevancia turística na provincia. Son o Camiño Inglés, o Camiño Fisterra-Muxía e o Camiño de Santo André de Teixido (nota de prensa ampliada ás 08:35 19/01/2017).
