Alumnos e alumnas da ESO da escola pública de Cea compiten no Festival de cinema de Zaragoza coa curtametraxe ‘Os xeranios do señor Alfonso‘ , filme que viña de gañar un premio no Festival de Cine Internacional de Ourense e que foi seleccionado na sección “Certamen Encuentro Internacional Escolares” do festival zaragozano recoñecendo así o valor desta reflexión animada sobre o envellecimento e abandono do rural. Porque a curta seleccionada “trata da comprensión, os coidados e o cariño” nun contexto de soidade e perda de referentes.
Para alén de traballos como a longametraxe documental “Querida Gina” de Susana Sotelo, “Verengo” de Víctor Hugo Seoane que se mostraron na XXIX edición do Cineeuropa ou, recuando no tempo, o “Mamasución” de Chano Piñeiro, referente absoluto da nosa cinematografía, a despoboación da aldea (mesmo a súa destrución física), a soidade e o envellecimento das xúas xentes teñen sido temas recorrentes do cinema galego, quer en traballos escolares ou amadores, quer no ámbito profesional.
Hai tres anos estudantes da USC rodaban unha curta sobre o despoboamento botando man da técnica da iPhoneography (só con dispositivos móbiles). Porén, na altura tratábase dun grupo de estudantes de 3º de Comunicación Audiovisual da Universidade de Santiago de Compostela (USC). Os xeranios do señor Alfonso é un traballo de animación realizado por estudantes da ESO que reflicte a angueira e preocupación que está a xerar nos máis novos a despovoación do rural. A complexa problemática do despoboamento do rural galego, o desleixo e a falta de políticas sociais, culturais e económicas de noso orientadas a vertebrar o territorio.
Os Xeranios do Señor Alfonso Director: David González Gómez Guión: Alejandro Pico, Carlota Álvarez, Nieves Calviño, Paula Vázquez Fotografía: David González Gómez Edición: David González Gómez Centro Formación: CPI Virxe da Saleta Intérpretes: (Voces) Alexandre Pico, Xosé Ramón Rodríguez, Neves Calviño Sinopse: Marco, un pícaro que mudou de pobo, non ten amigos cos que brincar e pasa as tardes na bici. Nun dos sus paseos coñece ao señor Alfonso, o derradeiro morador dunha pequena aldea con quen estreita unha fonda amizade.