A proposta do Concello de Cedeira de levar adiante unha actuación arquelóxica no castro das Croas só espertou o interese de 13 dos 39 propietarios dos terreos nos que se atopa. Esta escasa participación e a necesidade de darlle un novo enfoque ao proxecto, por razóns económicas, levan aos responsables municipais a barallar outras posibles alternativas.
A concelleira de Cultura, María Xosé Rodríguez, explicou que a normativa que prohibe a segregación dos montes, no caso de compra, complica a execución do proxecto no fundamental. Este atranco implicaría a limitación do terreo a intervir mediante a construción dunha pista arredor do perímetro, o que elevaría de maneira considerable o presuposto inicialmente previsto, ademais de dilatar os prazos de execución. A opción de mercar o conxunto dos montes tamén resulta inviable, segundo a responsable de Cultura. Todas estas cuestións, así como a proposta inicial do Concello de ter a autorización dos propietarios para levar adiante a actuación arqueolóxica -a maioría dos afectados queren vender- , foron os motivos da reunión que os responsables municipais mantiveron onte cos veciños.
