O Concello de Cedeira, a través da concellería de Medio Ambiente que dirixe Camilo Casal e dentro do seu “Plan municipal de eficiencia enerxética” iniciado a principios deste ano, organiza o I Seminario de Introducción á Eficiencia Enerxética, unha actividade que se impartirá entre o luns 17 e o venres 28 de outubro. O curso vai dirixido a desempregados ou persoas en activo que desexen explorar o campo da eficiencia enerxética aplicada a multitude de sectores como o mercado enerxético (libre e regulado), a iluminación, climatización, edificación…, así como os distintos modelos de negocio existentes a través de innovadoras fórmulas de inversión.
Pola natureza da formación, que pretende ser introdutoria, non é necesaria ningunha titulación técnica senón interese polo emprendemento e pola reciclaxe profesional. O programa, que terá 40 horas de duración, impartirase integramente no Instituto Punta Candieira de Cedeira en horario de maña (de 9.00 a 13.00). Ofertaranse un máximo de 30 prazas. Un total de 5 profesores especializados e con ampla experiencia serán os encargados de impartir as sesións, que tratarán sobre a enerxía, o mercado enerxético, a eficiencia nas empresas, as enerxías renovables, a iluminación interior e exterior, o modelo de negocio das ESCO, a consultoría enerxética, a implantación de sistemas de xestión SGEn para ISO 50001:2011, normativa e regulación e a eficiencia na edificación.
As persoas interesadas poden inscribirse no enderezo electrónico seminarioemprendedorescedeira@gmail.com indicando o seu nome e apelidos e un teléfono de contacto, antes do día 7 de outubro.
Nota de imprensa: Pingota Comunicación
