En Cedeira a centrifugación da praia semella levar aparellada a centrifugación da esquerda. Chega a Semana Santa e coas primeiras raiolas de sol úsmese perigo inmimente e a lóxica do pior. Logo dun inverno a velas vir, vén agora a urxencia de engolir calquera intervención por mor da sempiterna evasiva: a proximidade do verán e con el o turismo estacional. A grande escusa para deixar de facer o prometido, no fondo e nas formas. Por outras palabras: contemplar como posibel un novo deitado de area, quer das dunas, quer da ría. Prometeran nos programas electorais que ian entullar como o goberno do PP? Non foi o tratamento a darlle ao problema da praia da Madalena un dos puntos chave do pacto de goberno PSOE-ANOVA-BNG?
Parece que o cidadanismo a favor do ben común de Somos Cedeira, Ollaparo e ADEGA non conta na vila e terra de Cedeira, nen para o goberno do PP nen para o “goberno galeguista de progreso”. En xullo cumprirá dous anos o artigo “Remataron as obras na praia da Madalena. Seguro?, publicado pola plataforma cívica Somos Cedeira:
“O tempo o dirá e poderemos reler este post: No inverno asomarán de novo os paus, o noiro será baixo ao faltarlle a area que irresponsablemente se quitaron á duna e puxeron nos niveis baixos a disposición do mar. Xa que logo, cómpre preguntarse que farán nos vindeiros anos, pois xa non poden seguir rabuñando area do noiro ao haber menos, ¿de onde a van a quitar?”
Produce pasmo- porque nos preocupa- que da lectura dos comunicados sobre a praia do Concello de Cedeira aparecidos en diferentes medios, o lector adoito deduza que os membros da actual corporación non deberan ler nada do traballo de documentación e reflexión desenvolvido por Somos Cedeira e ADEGA (noutra xeira, tentaremos explicarlles aos lectores de porque sae a información en La Voz ou no Portal da Marina e non no Ollaparo, porque o ignoramos). Preocupante é que se afirme que “o uso da area da praia ou das dunas para renovar os áridos levados polo mar é unha solución que o goberno local non contempla, polo menos, non sen antes coñecer as súas posibles consecuencias medioambientais”. Quer dicer isto que serán coherentes en caso que se tiren consecuencias nocivas para o medio ambiente, incluida a Reserva?
Se o concelleiro de medioambiente Camilo Casal (Anova) afirma en La Voz que consultará a unha bióloga experta en dunas, sería interesante coñecermos quen é e se temos sorte de que informe públicamente nunha charla, asistirmos e aprendermos. Non coñecemos ningunha “experta” en dunas, será interesante saber quen é e poder consultarlle se a proposta experimental dos sacos que non se aplicou aquí é unha ocurrencia e talvez un método técnico contrastado e válido para outros areais atlánticos pero non para o de Cedeira. Por seren, disque, paliativos e preventivos até pasar o inverno e as vagas de mar estacionais ( ver: A guide to managing coastal erosion in beach/dune systems. Scottish Natural Heritage). Tampouco se lembran de que Anova, BNG e EU asinaran con Adega un manifesto nesa liña?
As circunstancias obxectivas non mudaran. Agás, con certeza, a posición de quen antes opositou sen remorsos tirando proveito do argumentario de Somos Cedeira e Adega fronte as medidas defendidas na altura polo PSOE e o PP. A mínima consistencia, proba e erro, o seu sería dubidar e por tanto, obrando en consecuencia, deberían teren presentes os compromisos e as promesas electorais. De non ser así, non hai nada que sinale que o que hoxe prognostican e onte incumpriran non vaia a ser mais unha vez ignorado.
Seica agora o goberno cedeirés procurará unha segunda opinión, “unha opinión autorizada antes de dar a súa conformidade ás actuacións plantexadas pola Demarcación de Costas para repor a area que o mar arrastrou durante o inverno no areal da Madalena” e “de maneira casi inmediata” aplicar “melloras no entorno da praia, unhas actuacións”. Do que se deduce que a primeira, elaborada por enxeñeiros mas non por un equipo multidisciplinar, é a de Costas e só esa. Obviando non só as propostas de Somos Cedeira e Adega, que conta con biólogos e documentalistas altamente cualificados para a lectura crítica da investigación disponibel. Cosas vereis Sancho….
O que si que levará a cabo con “caracter inmediato” o organismo estatal Costas, son medidas cosméticas de cara o verán, quer dicer, de cara o turismo estacional de verán. Limpeza de accesos, un muro de contención do regato de San Isidro e un carreiro peatonal, deixando seica para “máis adiante o asunto da reposición de area”. Pódese obviar que pese máis o turismo estacional que un sector productivo como a pesca? Non está a faltar en todo isto un maior compromiso dos profesionais da pesca e do marisqueo? É posibel planificar unha medida integral sen contar co compromiso e participación de todos os sectores implicados? Para cando transparencia e seguimento transparente por diversos axentes sociais ?
Porén, no pano de fondo do asunto cómpre debullarmos dous temas urxentes mas diferentes: por unha banda, a contaminación por efecto de verquidos e a necesaria separación de augas e o seu tratamento; e por outra, independente daquela, medidas para a rexeneración integral da ria e dos areais. Alén diso a Demarcación de Costas teima en antepor traballos de contención no noiro construido o ano pasado, o que dá unha idea da súa eficacia fronte os efectos dos temporais. Con ese tipo de medidas fuxidias, atállase a causa da desaparición da area ou trátase de algo máis ou menos temporal?
Nun intre de lucidez, parece que o goberno tripartito lembrouse de consultar a “alguén” de Adega. Seica esqueceran que a organización ecoloxista leva feito mil cousas a prol da praia? Por qué non se consulta o documentado e presentado? Non somos expertos en dunas, alén do coñecemento de anos de observación da praia onde medramos. Ignoramos tamén cales son as descoñecidas motivacións do goberno tripartito para ignorar o traballo desenvolvido por “Somos Cedeira” e as moitas publicacións do asunto nesta revista. Talvez deberian esforzase un chisco e lembrar que ADEGA leva anos axudando nisto.Deberan telo ben presente cando recorden o moito que se agarraban á pancarta (detrás da cal saira fotografados varios concelleir@s actuais do goberno tripartito). Oportunismo? Pois é. Porén, aquí teñen un ofrecimento aberto de colaboración pero tamén o noso compromiso co punto partida, a liña vermella respeito a plantexamentos que contemplen o deitado de area:
a) a duna alta non debe ser manipulada,
2) os fondos da ria non deben ser remexidos.
3) negativa total a achegar áridos doutros lugares e moito menos de canteira.
Entanto o alcalde Moreda (PSOE) fica parapetado de todo isto, coidandose de agochar que os recheos de plásticos e refugallos das obras foron cousa do seu compañeiro de partido exalcalde Vergara (PSOE), os concelleiros e concelleiras de Anova e BNG fan como se o problema xurdira da nada, ignorando os propios comunicados e accións apoiando as propostas de Somos Cedeira e Adega. Porque ninguén agochou nunca a complexidade do problema, por iso non se entenden os vellos modos da dereita. Mais debe ser dificil dicir adeus a todo iso cando se pacta co PSOE. E todo apunta que será culminación da “síndrome de Estocolmo”.
O problema da Praia da Madalena é un problema multidisciplinar que atinxe a químicos, biólogos mariños, ornitólogos, ecólogos, ambientalistas,…. e á sociedade civil toda. Por un motivo evidente: é un ben común e un problema complexo. E o mesmo se pode afirmar con respeito á praia, á ría de Cedeira e a moitas outras cousas. Todos nos equivocamos, ninguén é experto en todo, mas todos somos cidadáns merecedores de respeito.
Ao mellor tamén che interesa:
A Madalena despois da primeira vaga de mar
O BNG de Cedeira pide unha intervención de contención na praia da Madalena
Haberá que estar atentos. Coido que isto era xa previsible. Correr agora para tomar medidas cosméticas non vale. Por certo, ¿ non se lembran do exposto anteriormente, ou das concentracións levadas anteriormente donde estaban presentes? Fáganse as cousas ben. Coido que Somos Cedeira, Ollaparo e ADEGA fixeron o suficiente para poñer as cousas claras. A miña conciencia pídeme seguir apoiando a quen fixo todo o posible para informar e por solucións non cosméticas ao problema. Repito: fáganse as cousas ben, non so pensando no verán.