A Escola Infantil de Cedeira vén de principiar unha interesante campaña de información e sensibilización ao sumarse á que veñen facendo hai tempo moitas escolas do país para recuperaren a figura do Apalpador (ou Pandigueiro). As educadoras do centro consideran en carta dirixada ás familias “que é importante recuperar as tradicións galegas e transmitirllas ao alumnado”, animándoas a colaboraren abríndolles “a porta da vosa casa a esta personaxe da nosa terra”.
No comunicado, descríbese a figura amabel do Apalpador e os valores de solidariedade, sustentabilidade e respeito que simboliza. Ese vello de barba rubia que vive nas devesas facendo carbón todo o ano para escorrentar o frío , apañar castañas e tallar briquedos de madeira, pedra ou cartón, respeitando a natureza. Unha presenza afábel que o fai compatibel coas outras personaxes importadas do Nadal global e do consumismo irresponsabel xa que este noso Apalpador visita as casas a partires da noiteboa até o 31 de decembro, dependendo das zonas. Así nolo amosan os documentos, farturento e agarimoso, ao apalpar a barriguiña das crianzas por ver se estaban mantidas e non pasaban fame.
Abrámoslle a porta ao Apalpador !