O vindeiro sábado, día 13 de xullo, o Auditorio Municipal de Cedeira acollerá ás 22:00 horas un concerto de aCadaCanto, o último proxecto de Guadi Galego (Berrogüetto, Espido, Nordestinas…), Xabier Diaz (voz de Berrogüetto) , Guilherme Fernández (Berrogüetto, Espido) e Xosé Lois Romero. Unha formación que enxerga á perfección o que a música é como experiencia estética que dura o que dura o tempo da súa execución. Será por iso que esa consciencia do efémero musical alicerce o ir e vir dos catro músicos entre as súas bandas de orixe e a procura da depuración sonora nun proxecto recollido no disco homónimo con pezas xa coñecidas como Aurora e letras de Xosé María Alvarez Blázquez e Carlos Rivero, entre outros. A música como ficción permite ir entrefrebrando ritmos e vivencias, serve de porta xiratoria da experiencia que nesta xeira se torna máis intimista e reflexiva. Após xira por Montevideo e Buenos Aires, o público cedeirés poderá gorentar a música de catro artistas esenciais no devir musical galego.
Prezo da entrada 8 €
