O executivo do PP, no goberno central, vai consumando paseniño a súa política neoliberal. Agora trátase de mercantilizar dereitos. Anunciou esta segunda-feira o secretario de Estado do Comercio que comprar casa en España vai dar dereito á autorización de residencia. Quer dicir, un estranxeiro que merque vivenda vai ter dereito a autorización de residencia se a casa custa máis de 160.000 euros. Seica a iniciativa se dirixe, preferencialmente, a cidadáns da China e da Rusia.
Após un ano, o goberno de Rajoy xa non pode disimular por máis tempo o incumprimento obsceno do programa electoral e o fracaso absoluto das políticas de austeridade que están a levar a milleiros de persoas á miseria mentres trata con luvas de sede á banca especuladora. Entanto se están a producir desafiuzamentos masivos ou se lles nega o dereito de atención sanitaria básica ou o acceso a programas de saúde pública a cidadáns sen dereito de residencia, o Estado español vende cidadanía.
