(Soutomaior). O presidente do estado español xustificou onte a subida do IVE para manter os servizos públicos, nada dixo porén de que tamén quere cumprir coa ortodoxia neoliberal para 2012, un 6,3% do PIB. O PP arrepía dunha derrota en Galiza. Por iso Núñez Feijoó non dubidou en teimar, mais unha vez, no que semella será o seu mantra electoral, esta vez por voz do Informe Semanal, cada vez máis parecido a un boletín do PP : Galiza é quen menos déficit ten do estado español, cando noutras partes se reduce a actividade hospitalaria, aquí fanse hospitais novos a eito; aquí, pódeselle pagar a todo mundo. Nada dixo do crónico déficit social. E aleccionounos: primeiro, dicirlle a verdade aos cidadáns ( sen polígrafo, claro é).
A incontinencia verbal non é boa en quen ten responsabilidades públicas: “Galícia é unha comunidade capaz de facer fronte ás súas débedas. Desgraciadamente, iso non o poden dicir todas”.
Non dixeron, madialeva, de quen estivo a poñer cartos na boeta. De Cataluña, por exemplo, o goberno español quédase entre o 8 e o 10% do seu PIB: por cada euro recadado en Cataluña, 43 céntimos non se gastan en alí.
O PP segue a teimar en trasladar unha visión providencialista da ortodoxia neoliberal ( a subida do IVE como única alternativa) e unha ligazón cada vez máis obscena co catolicismo e co nacionalismo español. O aparello de Estado estase a mobilizar na súa totalidade en Galiza, e non dubidan en contrapoñer territorios. Medrará o soberanismo.